網誌

聖誕惜物




又到聖誕~又到聖誕~

又到了一年一度的聖誕節,作為其中一個資源消耗最多嘅節日,小編決定今個聖誕節,俾幾個tips大家,令大家可以過一個環保聖誕,為地球送上一份聖誕禮物。

電子聖誕卡 :每逢聖誕身邊總有幾個朋友會寄聖誕卡 (雖然小編我冇),但大家有冇諗過,傳統聖誕卡除咗消耗紙張之餘,亦難以保存。反而電子聖誕卡可以永遠留喺電子郵箱,令朋友可以保存到份心意之餘,仲可以即時用手機睇到張聖誕卡,既方便又環保。

聖誕禮物 :大家包禮物時不妨考慮用一啲無用嘅紙張,例如報紙同雜誌紙,減少不必要嘅浪費。而禮物亦推介大家送一啲實用嘅物品畀朋友,例如食物、工具等,確保份禮物唔會嘥。但如果份禮物真係唔啱用嘅,大家可以考慮下捐畀有需要嘅人,唔少慈善團體會收起呢啲禮物,再交畀有需要嘅小朋友,令佢哋有一個開心聖誕。

聖誕大餐 :大家食聖誕大餐嗰陣,可以諗下叫多啲菜,少啲肉,減少肉類製品嘅消耗,又可以冇咁濟,仲可以健康啲𠻹,健康先係最好嘅禮物。
同埋去聯歡會時,記得自備餐具或選用可重用餐具啊,唔係啲膠餐具會好慘㗎,你有你過開心聖誕,佢哋就畀人送去堆填區。

聖誕裝飾 :如果可以嘅話,請大家千祈唔好買聖誕裝飾,同屋企人、朋友一齊去尖沙咀睇燈飾會係一個更好嘅選擇。

另外,請大家可憐下啲聖誕樹,如果大家唔想見到聖誕樹一車車咁俾人送去堆填區嘅話,可以將佢哋送畀環保署,佢哋會將天然聖誕樹循環再用,留返低一份心意。

最後,小編祝大家有個開心又環保嘅聖誕,聖誕節快樂。


關注議題:
關鍵字:


最新網誌



相關文章

返回頁頂